Bakıda keçirilmiş minifutbol üzrə dünya çempionatının qalibləri üçün təltifetmə mərasimi baş tutub.
Milli Gimnastika Arenasında təşkil olunan tədbirdə Dünya Minifutbol Federasiyasının rəhbəri Filip Juda, vitse-prezident Peter Kralik, Azərbaycan Minifutbol Federasiyasının prezidenti Orxan Məmmədov, onun müavini Taleh Nəsibov, eləcə də gənclər və idman naziri Fərid Qayıbov və digər rəsmilər iştirak ediblər.
Çıxış edən Fərid Qayıbov dünya çempionatının Azərbaycanda uğurla təşkil olunduğunu qeyd edərək, bu münasibətlə xalqı təbrik edib.
Daha sonra AMF rəhbəri Orxan Məmmədov söz alaraq, yarışın həyata keçirilməsində zəhməti olan hər kəsə minnətdarlığını bildirib və Bakının bu mötəbər idman tədbirinə ev sahibliyi etməsindən məmnunluğunu ifadə edib.
Mərasimin davamında dünya çempionatının qalibi olan Azərbaycan millisi qızıl medallar və kubokla mükafatlandırılıb. Macarıstan komandası ikinci yeri tutaraq gümüş medallara, Serbiya isə üçüncü yerin sahibi kimi bürünc medallara layiq görülüb.
